Die Saach von dä Irrlichter

Text in Mundart von Marie Lindner

Über Land war mal ä Moo

mit seinä Tochter gangä.

Beim Hemmgen auf dä Raflderwiesen

wars den Mädlä richtich bang.

Dä Vadder war scho aufn Schteech,

äs Mädlä wollt a nach,

da kummt grad ä alts Mütterlä,

als wollts rä öbbäs saach.

Dabei hats khabt än großn Gruuch,

där war rächt eichnarti,

äs Mädlä sollt dadrauß versuch,

als wärs scho ganz malati.

Äs wollt nit trink, äs hat ken Durscht,

gibt's da halt zu verschtenn.

Verschwundn war äs Mütterlä,

als wär a garnix geschähn.

Äs Mädlä is sein Vadder nach

und hat erzehlt die Geschicht,

där seecht, o Mädlä warstä dumm,

jetz will i dir bericht.

Eeen Tropfn hästä doch getrunkn,

des wär välleicht dei Glück,

beschtimmt is da ä Schatz zu finnä,

da auf den Wiesnstück.

Vielleicht hästä die Fraa erlöst,

die da verwünscht muß wandl.

In so än Fall dörf mä nit lang denk,

da muß mä eem glei handl.

Jetz is zu schpät, doch da schtimmts nit,

da drüm, da bei dä Bääm,

da wärn seit ewichä Zeitn scho

Irrlichter tanzn gsähn.